Seatavern

Eenvrouvertoning met: Petru Wessels
Regie: Carel Trichardt
Hoe ver strek ’n ma se liefde – selfs as haar kinders van hout gemaak is? Gebaseer op ’n ware verhaal, bring Petru Wessels lewe aan hierdie roerende eenvroustuk deur Ludmilla Bollow. ’n Kinderlose vrou, ’n beeldhouer-man, en 27 kindertjies van hout wat vir haar werklikheid word. Maar wanneer haar “kinders” van haar af weggeneem word, ontvou ’n storie van liefde, verlies en onwrikbare hoop.
Die stuk vertel die storie van n kinderlose egpaar. Die man, ’n beeldhouer, maak elke jaar vir sy vrou ’n baba uit hout. Hy maak uiteindelik vir haar 27 kinders uit hout. Vir haar is hulle nie houtpoppe nie, maar kinders van vlees en bloed. Na haar man se dood, gaan sy ander beelde na die museum op die dorp. Die verhaal ontvou verder wanneer die museum se mense die vrou se “kinders” ook van haar wil wegneem.
Universele temas soos kinderloosheid, ouerliefde, liefde tussen man en vrou asook ouderdom en demensie word aangespreek – altyd teen die agterdoek van Hoop en Lig.
Hierdie opvoering is in 1996 deur Petru Wessels by die KKNK van daardie jaar opgevoer. Dit is nou nuut verwerk en die regie word deur Carel Trichardt waargeneem.
Die teks spreek temas aan waardeur mense deur die jare en vandag steeds deurentyd geraak word.
Terwyl kinderloosheid die sentrale tema is, staan dit naas tydlose menslike emosies en toestande soos verlies, demensie en bo alles liefde – liefde tussen mense maar ook liefde vir ’n kind of kinders wat nie noodwendig van vlees en bloed is nie.
Hierdie temas is universeel. Dit verklaar waarom die teks reeds in onder andere Sjinees en Portugees vertaal is en ook in oa Hong Kong en in Brasilië opgevoer is.
Ook in Suid-Afrika is daar voorbeelde van kinderlose egpare wat eiesoortige maniere vind om hulle kinderloosheid te verwerk. In 1996 het Helena Rennie se verhaal die nuus gehaal. Sy en haar man het nie kinders gehad nie en hy het vir haar ’n pop gegee wat sy ‘Meisie’ genoem het en wat sy soos ’n regte kind hanteer het. Aan die einde van haar lewe het sy in armoede geleef en was haar een groot begeerte dat Meisie saam met haar begrawe moes word. Deur die goedhartigheid van die publiek kon haar wens bewaarheid word.
Hierdie verskynsel waar egpare ’n pop soos ’n kind vertroetel en versorg, is ’n erkende sielkundige toestand wat met die term folie à deux aangedui word. Dit is in Die Burger deur dr Heinz Mödler beskryf as ’n baie moeilik behandelbare geestestoestand.
Oorsprong van die verhaal
Die storie van 27 kinders vir ’n vrou waarin die lewensverhaal van die karakters’ Engel’ en ‘Vernon’ vertel word, is direk gegrond op die lewens van Cal en Ruby Black wat in die 1970’s in ’n klein dorpie met die naam Possum Trot in Kalifornië gewoon het. Die egpaar was kinderloos en Cal het vir Ruby lewensgrootte poppe uit hout gekerf wat hulle soos kinders versorg het. Buite hulle eenvoudige huis het van die poppe op swaaie gesit om verbygangers te lok na die Birdcage Theatre binne die huis waar die ‘houtkinders’ gehore op die verhoog vermaak het. Cal is sewe jaar voor Ruby oorlede en sy self is in Julie 1980 oorlede. Die poppe is deur die eksekuteur van die boedel aan ’n kunsgalery in Los Angeles verkoop en die geld is gebruik om grafstene op Cal en Ruby se grafte op te rig.
Die berig oor Cal en Ruby en hulle houtkinders het die Amerikaanse dramaturg Ludmilla Bollow aangegryp en sy het ’n dramateks daaroor geskryf.
Tydsduur: 70 min
Ouderdomsbeperking: Geen

Kaartjienavrae:
Telefoon: 012 880 26 35
e-pos: navrae@kalfiefees.co.za
www.kalfiefees-hermanus.co.za
Werksure:
Maandag tot Vrydag: 9vm to 5 nm
Saterdae: 10vm to 2nm
Sondae: 10vm to 1nm
Publieke Vakansiedae: 10vm to 1nm